上個星期(1-3.12)在瑞士日內瓦舉行咗世界貿易組織（WTO）第7次部長級會議。如果大家仲有印象，對上一次2005年WTO部長級會議係在香港舉行。

 機緣巧合，我同另一個一年級德國同學，參加咗一個關注全球化問題既德國非政府組織(NGO)──ATTAC舉辦既‘旅行團’，開車由德國去日內瓦。

我地留咗响日內瓦足足一個星期，除咗參加28.11既大型遊行外，仲有其他座談會，工作坊，導覧團等等。對我地研究跟全球化現象既學生嚟講，呢次既所見所聞算係一次難得既機會，接觸唔同層次既人，聽下唔同既觀點，補充一下書本既理論。

 十年前，1999年美國西雅圖舉行咗WTO部長級會議，嗰次係第一次大型示威抗議，反對全球化。自始，全球化──更準確──貿易自由化(Liberalization)帶來既資源分配不公，貧富兩極化等問題，引起咗世界既關注。10年後既今日，WTO，主力推動自由貿易既國際組織，再次番到WTO總部日內瓦，進行新一輪貿易談判。

除咗參加有人燒車既遊行外，我地仲參加一Ｄ座談會，了解一下世界各地因貿易自由化生計受威脅既農民故事。另外，我地亦去咗一個由聯合國屬下既組織──國際勞工組織(International Labour Organization)舉辦既座談會，佢地請咗好多在WTO有重要角色既人嚟講述自己既觀點，包括WTO總幹事-- Pascal Lamy,以及一Ｄ發展中國家既貿易部長。呢Ｄ人以前真係响新聞先見到，而家有機會聽下佢地既對話，以及睇下佢地點樣回應現場觀眾既發問，真係一個好難得既機會。

此外，我地仲去咗日內瓦既洲際酒店(Intercontinental)，參加咗一個新書發佈會—。呢本書──“Refroming the World Trade Organization: Developing Countries in the Doha Round”──係由一個南非WTO談判總代表寫，以局內人既觀點講述WTO應如何改革，令貿易真正可以幫助發展中國家改善生活。

 總代表──Ismail先生為人親切友善，聽完佢介紹自己本書之後，我地搵咗佢簽名，佢問我响邊嚟，我話係香港，我順便介紹下我响德國讀跟書，啱啱做跟一個關於千禧發展目標(Millennium Development Goals)既研究，相信佢本書會對我地個研究好有幫助。點知佢就响本書到寫 “It’s a pleasure to meet you and good luck with your research”，之後仲比咗佢張咭片我話，如果我地仲想要多幾本書，可以Email比佢^^

其實呢本書係由德國一個Social Democrat 既政黨SPD (即係反戰英雄施羅德個政黨)屬下既基金會 Friedrich Ebert Stiftung，同印度非政府組織Center for International Trade出既，如果大家有興趣，可以去以下既網頁下載

 http://library.fes.de/pdf-files/bueros/genf/06877.pdf

 此外，我地仲參加咗一個叫Cooperate Criminal Guided Tour，了解跨國企業分別對金融危機，粮食危機，以及氣候變化既角色及責任。

離開咗Kassel一個星期，但係响Geneva又碰上幾個Kassel熟悉既面孔，畢竟Uni Kassel都係德國首屈一指進步思想既搖籃。